La barchëtta
Testo:
Guarda che bianca luna,
Guarda che ciel seren;
Duna, mia cara, duna,
Ven, Carolina, veri.
Una tranquila arietta
Sent’a consoula ’l cheur:
Ven, ven su la barchetta
Dl’amour e del boneur.
I genii da le sponde
Al mar a fan la strà,
La terra, i vent e l'onde
Per noui a smio creà;
Nossgnour am lo permetta,
Me ciel a l’è to cheur:
A voga la barchètta
Dl’amour è del boneur.
A veulo amour ch’a sia
Na splua semnà dal vent;
Cred pà: l'è una busia:
Vogouma alegrament.
Guarda coul’isoletta!...
Andoumie, o me bel cheur?
A vira la barchetta
Dl'amour e del boneur.
L’ultima steila a svela
Che l'alba a veul spuntè,
Ma coul mai cambiè vèla
Comenssa a fè bajè;
Na pcita nuvoletta
A ven a lurbè ’l cheur:
A bautia la barchetta
Dl'amour e del boneur.
L’orient smia pi nen candi,
El ciel pi nen azur;
I turbini a pio l'andi,
Lontan a l’è già scur;
As leva la maretta
Un sent a roujè 'l cheur;
A dagna la barchetta
Dl’amour e del boneur.
Tempesta sout e dsoura,
Tron, losna. Losna e tron
El rem a va ’n maloura
Bondì vela e timon:
A casca la fusetta,
A bat pi nen el cheur...
Bon viage a la barchetta
Dl’amour e del boneur.